Ziur Robert Rodriguezen ‘Desperado’ eta ‘Abierto Hasta el Amanecer’ filmak gogoratzen dituzula. Orain, lehen aldiz Euskadin, zuzenean gozatzeko aukera izango duzu. Los Angeleseko mugaldeko rocka egiten duen taldea, datorren uztailaren 21ean izango da Gasteizen, Europan zehar egingo duen ‘Back into the darkness tour 2008’ izeneko bira dela-eta.
Tito Larriva abeslari eta gitarra-jole mexikarrak sortu zuen ‘Tito & Tarantula’ taldea Los Angelesen, 90eko hamarkadaren erdi aldera. Honen aurretik, ‘The Plugz’ punk taldea sortzeagatik eta ‘Repo Man’ bezalako filmetan aritzeagatik zen ezaguna. 90eko hamarkadan izan zuten arrakasta, hein handi batean, Robert Rodríguez zuzendariari esker izan zen, beren musika ‘Desperado’ (1995) eta ‘Abierto Hasta el Amanecer’ (1996) filmetarako (non Salma Hayek ahaztezina ‘After Dark’ abestiaren musikarekin dantzatzen zen, lepo gainean suge bat zeramala) erabili baitzuen. 1997an, "Tarantism" izeneko beren lehen bilduma kaleratu zen, eta horren ondoren, ‘Hungry Sally and Other Killer Lullabies’ (1999), ‘Little Bitch’ (2000) eta ‘Andalucia’ (2002).
Gaur egun Tito, Lucy La Loca (baxua), Rafael Gayol (bateria) eta Steven Hufsteter (gitarra) musikariek osatzen duten taldeak, bosgarren diskoa aurkeztuko du Hell Dorado aretoan: “Back Into The Darkness’. Eraginik? Bluesa, Iparramerikako hegoaldeko rocka, psicobillya, tex mexa...
